ޗައިނާ ސަރުކާރުން ދިން ހިލޭ އެހީގައި މާލޭގެ ހުރިހާ މަގެއް ހަދަނީ

ޗައިނާ ސަރުކާރުގެ ހިލޭ އެހީގެ ދަށުން މާލޭގެ ހުރިހާ މަގެއް ހަދަން ނިންމާފައިވާ ކަމަށް ރައީސުލްޖުމުހުރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

މަޖިލީހުގެ އިންތިޚާބުގައި މައްޗަންގޯޅި މެދު ދާއިރާއަށް ވާދަކުރައްވާ އަމިއްލަ ކެންޑިޑޭޓު މުޙައްމަދު ޒަމީރުގެ ކެމްޕެއިނަށް ރޭ ބޭއްވި ހަރަކާތުގައި ވާހަކަދައްކަވަމުން ރައިސް ވިދާޅުވީ މާލޭގެ މަގުތައް ހަދަން ޖެހިފައިވާކަމަށާއި އެމަނިކުފާނުގެ ސަރުކާރުން ދެވަނައަށް އެންމެ އިސްކަމެއް ދެއްވައިގެން ހައްލު ކުރައްވާނީ މާލޭގެ މަގުތަކުގެ މައްސަލަ ކަމަށެވެ.

ރައީސް ވިދާޅުވީ ޗައިނާގެ ހިލޭ އެހީގައި މާލޭގެ ހުރިހާ މަގުތަކެއް ހަދަން ހަމަޖެހިފައިވާ ކަމަށާއި އެ މަސައްކަތުގެ ކަމާބެހޭ ޓީމެއް މިހާރު ރާއްޖޭގައި އުޅޭ ކަމަށް އަދި ފަންނީ މަސައްކަތްތައް ނިމުމުން މަގު ހެދުމުގެ މަޝްރޫއުގެ އަމަލީ މަސައްކަތް ފެށިގެންދާނެ ކަމަށެވެ.

ޗައިނާގެ ހިލޭ އެހީގެ ގޮތުގަ ދިން 130 މިލިއަން ޑޮލަރުގެ ތެރެއިން ހިންގާ މަޝްރޫއު ތަކުގެ ތެރެއިން އެންމެ އިސްކަންދޭ މަޝްރޫއަކީ މާލޭގެ މަގު ހެދުމުގެ މަޝްރުއޫ ކަމަށް ރައީސް މީގެކުރިންވެސް ވަނީ ވިދާޅުވެފައެވެ.