ހިޒްބުﷲގެ ހަމަލާތަކެއްގައި އިސްރާއީލަށް ބޮޑެތި ގެއްލުންތަކެއް

ލުބްނާނުގެ ހިޒްބުﷲ ޖަމާއަތުން އިސްރާއީލުގެ ވެރިރަށް ޓެލްއަވީވަށް ދިން ރޮކެޓު ހަމަލާތަކެއްގެ ސަބަބުން ބޮޑެތި ގެއްލުންތަކެއް ލިބިއްޖެއެވެ.

ޓެލްއަވީވުގައިވާ ޓެރަރިސްޓް މަރުކަޒަކަށާއި އަސްކަރީ ހައްސާސް ޕޮއިންޓްތަކަކަށް ހަމަލާތަކެއް ދީފައިވާނެ ކަމަށް ހިޒްބުﷲ އިން ބުނެފައި ވާއިރު ހިޒްބުﷲ ދިން މިސައިލް ހަމަލާތަކެއް ޓެލްއަވީވުގެ އެތައް އިމާރާތަކަށް އެރުމުގެ ސަބަބުން މާއްދީ ބޮޑެތި ގެއްލުންތަކެއް ލިބިފައިވާކަމަށް އިސްރާއިލުގެ މީޑީއާތަކުން ބުނެފައި ވެއެވެ.

އިސްރާއީލުގެ ފުލުހުންގެ ބަޔާނެއްގައި ބުނާގޮތުން ހިޒްބުﷲ އިން ފޮނުވި މިސައިލުތައް ޓެލްއަވީވުގެ އިމާރާތްތަކަކަށް ވަނީ އަރާފައެވެ.

މީގެ އިތުރުން އިއްޔެ ހަމާސް ޖަމާއަތުން ވަނީ އިސްރާއީލުގެ ސިފައިންގެ ތެރެއިން ހަތަރު މީހަކު ޣައްޒާގައި މަރާފާއެވެ. އިސްރާއީލު އިއްޔެ ވަނީ ހިޒްބުﷲ ގެ މީޑިއާ އާބެހޭ ތިން މީހަކު މަރާލާފައެވެ.

އިސްރާއީލަށް ރައްދު ދިނުމުގެ ގޮތުން މިފަހަކަށް އައިސް ހިޒްބުﷲ ދޭ މިސައިލް ހަމަލާތަކުގެ ބޮޑުބައެއް އިސްރާއީލަށް ދަނީ އަރަމުންނެވެ. ފާއިތުވި ހަފްތާތަކުގައި ހިޒްބުﷲގެ އެތައް މިސައިލެއް ވަނީ އިސްރާއީލުގެ އިގްތިސާދީ ސިޓީކަމަށްވާ ހައިފާއަށް އަރާފައެވެ. މީގެ ސަބަބުން އިސްރާއީލަށް ވަނީ ބޮޑެތި ގެއްލުންތަކެއް ލިބިފައެވެ.

އެގޮތުން އިސްރާއީލަކީ އަމާންކަން ނެތް ގައުމެއް ކަމުގެ އިހްސާސް ކުރެވި އިސްރާއީލުގެ އާންމުންނަށާއި އިސްރާއީލުގައި އިންވެސްޓް ކޮށްގެން އުޅޭ އިންވެސްޓަރުން ވަނީ އިސްރާއީލު ދޫކޮށް އެހެން ގައުމުތަކަށްވެސް ދާންފަށާފަ އެވެ.