މަސްވެރިންގެ ފައިސާ ދޭން ހަވާލުކޮށްފި

މިއަދާ ހަމައަށް މަސްވެރިންނަށް ނުދީ ހުރި ފައިސާގެ ޖުމްލަ އަދަދު ދިނުމަށް މިފްކޯއާ ހަވާލުކޮށްފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ރައީސް އެކްސްގައި ކުރެއްވި ޕޯސްޓެއްގައި ސަރުކާރުގެ މެނިފެސްޓޯގައިވާ ފަދައިން 48 ގަޑިއިރު ތެރޭގައި ދެމެހެއްޓެނިވި ގޮތެއްގައި ފައިސާ ދެވޭނޭ ނިޒާމު ގާއިމު ކުރުމުގެ މަސައްކަތް ކުރަމުންދާ ކަމަށް ވިދާޅުވި އެވެ.

މަސްވެރިން ކިރާ މަހަށް 48 ގަޑިއިރުގެ ތެރޭގައި ފައިސާ ދިނުމަކީ ސަރުކާރުގެ ވައުދެއް ކަމަށާއި އެއީ "ފިލާނެ ވައުދެއް" ނޫން ކަމަށް ފިޝަރީޒް މިނިސްޓަރު އަހުމަދު ޝިޔާމް ވެސް މިއަދު ވަނީ ވިދާޅުވެފަ އެވެ.

މިނިސްޓަރު ޝިޔާމް ވިދާޅުވީ ސަރުކާރު ހަވާލުވިިއިރު މަސްވެރިންނަށް 250 މިލިއަން ރުފިޔާ ނުދެވި ބެކްލޮގްގައި އޮތްކަމަށާއި  އެ ފައިސާ ދައްކާ ހަލާސްކޮށް މަސްވެރިންނަށް ދޭންޖެހޭ ފައިސާ މި ސަރުކާރުން ބަރާބަރަށް ދެމުންދާ ކަމަށެވެ.