ޕީއެންސީއަށް 33 ގޮނޑި ލިބުމަކީ ބޮޑު ކާމިޔާބީއެއް ކަމުގައި ރައީސް ވިދާޅުވެއްޖެ

ލޯކަލް ކައުންސިލްތަކާއި އަންހެނުންގެ ތަރައްގީ އަށް މަސައްކަތްކުރާ ކޮމިޓީތަކުގެ ބައި ވެރިކަންކުރާ ޕީއެންސީއަށް 33 ގޮނޑި ލިބުމަކީ ބޮޑު ކާމިޔާބީއެއް ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ. 

މިރޭ އެކްސްގައި ކުރެއްވި ޕޯސްޓެއްގައި ޕީއެންސީގެ ރައީސްކަން ވެސް ކުރައްވަމުން ގެންދަވާ ރައީސް މުއިއްޒު ވިދާޅުވީ މިއަދު ލޯކަލް ކައުންސިލް ތަކުގެ ބައި އިލެކްޝަންގައި ބާއްވަން ކަނޑައެޅި 37 ގޮނޑީގެ ތެރެއިން އިންތިހަބަކާ ނުލައި 24 ގޮނޑި އެ ޕާޓީއަށް ލިބުމާއި އިންތިހާބު ބާއްވައިގެން 9 ގޮނޑި ލިބުމަކީ ވަރަށް ބޮޑު ކާމިޔާބީއެއް ކަމަށެވެ.

އެގޮތުން ރައީސް ވިދާޅުވީ އަތޮޅު ކައުންސިލް ރައީސްކަމުގެ 1 ގޮނޑި، ރަށު ކައުންސިލް ރައީސްކަމުގެ 1 ގޮނޑި، ރަށު ކައުންސިލް މެމްބަރުކަމުގެ 2 ގޮނޑި، އަންހެނުންގެ ތަަރައްގީ އަށް މަސައްކަތްކުރާ ކޮމިޓީގެ 29 ގޮނޑި މިއަދު ޕީއެންސީން ވަނީ ކާމިޔާބުކޮށްފައި ކަމަށް ރައީސް ވިދާޅުވި އެވެ. 

ރައީސް ކުރެއްވި ޕޯސްޓުގައި ވަނީ އިންތިހާބު ކާމިޔާބުކުރި ކެންޑިޑޭޓުންނަށް މަރުހަބާ ދަންނަވައި އިންތިހާބު ކާމިޔާބު ކުރުމަށް މަސައްކަތްކުރި ފަރާތްތަކާއި ވޯޓުގައި ބައިވެރިވި މީހުންނަށް ޝުކުރު އަދާކުރައްވައިފަ އެވެ.