ރޯދަ މަހުގައި ދަންވަރު 3 ޖަހަންދެން ރެސްޓޯރެންޓުތަކާއި ކެފޭތައް ހުޅުވޭނެ

މިއަންނަ ރޯދަ މަހުގައި ފަތިހު 05:30 ދެށިގެން ދަންވަރު 03:00 ޖަހަންދެން ކެއިންބުއިމުގެ ޚިދުމަތްދޭ ކެފޭ ރެސްޓޯރެންޓުތައް ހުޅުވާފައި ބެހެއްޓޭނީ ކަމަށް އިކޮނިމިކް މިނިސްޓްރީން ބުނެފިއެވެ.

މިނިސްޓްރީން ކޮށްފައިވާ އިއުލާނެއްގައި ރޯދަމަހާއި ޝައްވާލް މަހުގެ ފުރަތަމަ ހަތް ދުވަހު ކެފޭ ރެސްޓޯރަންޓުތަކާއި ފިހާރަތައް ހުޅުވާފައި ބެހެއްޓޭނެ ގަޑިތައް ވަނީ އިއުލާނުކޮށްފަ އެވެ.

އެގޮތުން ކެއިން ބުއިމުގެ ޚިދުމަތްދޭ ތަންތަން ޝައްވާލް މަހުގެ ފުރަތަމަ ހަތް ދުވަހު ހުޅުވާފައި ބަހައްޓަންވާނީ އެދުވަހެއްގެ ފަތިހު 4:30 އިން މެންދަމު 3:00 އާ ދެމެދު ކަމަށް މިނިސްޓްރީގެ  އިއުލާނުގައި ބުނެފައި ވެއެވެ.

އަދި މިމަހުގެ 15 ވަނަ ދުވަހުން ފެށިގެން ރޯދަ މަހުގެ ދުވަސްތަކާއި ޝައްވާލް މަހުގެ ފުރަތަމަ ހަތް ދުވަހު 05:30 ފެށިގެން މެންދަމު 01:00 ޖަހަންދެން ފިހާރަތައް ހުޅުވާފައި ބެހެއްޓޭނެކަމަށް ވެސް އިއުލާނުގައި ވެއެވެ.

މިނިސްޓްރީގެ އިއުލާނުގައި ކާބޯތަކެތީގެ ޚިދުމަތްދޭ ފަރާތަތްކުންނާއި މުދާ ވިއްކާ ތަންތަނުން އިއުލާނުގައި ވާފަދައިން އަމަލު ކުރުމަށް އެދިފައި ވެއެވެ.