ކުރީ ސަރުކާރު ނިމިގެން ދިޔައިރު ކުންފުނިތަކަށް 9000 މިލިއަން ރުފިޔާގެ ފައިސާ ދޭން ހުރި ކަމަށް ރައީސް ވިދާޅުވެއްޖެ

ކުރީ ސަރުކާރު ނިމިގެން ދިޔައިރު ކުންފުނިތަކަށް 9000 މިލިއަން ރުފިޔާގެ ފައިސާ ދޭން ހުރި ކަމަށް ރައީސް ވިދާޅުވެއްޖެއެވެ.

ރައީސް މިހެން ވިދާޅުވީ ޕްރޮގްރެސިވް ކޮންގްރެސް ކޯލިޝަންގެ ޖަލްސާގައި ރޭ ވާހަކަފުޅު ދައްކަވަމުން އެމްޑީޕީން މި ސަރުކާރަށް ނިސްބަތްކޮއް ޕްރޮޖެކްޓްތައް ހުއްޓުވާ ކަމަށް ބުނާ ވާހަކައަށް ރައްދު ދެއްވަމުންނެވެ. 

މިގޮތުން ރައީސް ވިދާޅުވީ އިވިގެން ދަނީ ފާއިތުވި މަސްތަކުގައި މި ސަރުކާރުން ކަމެއް ނުކުރާ ކަމަށް އިދިކޮޅު މީހުން ދައްކާ ވާހަކަތައް ކަމަށެވެ. އަދި ކުރީ ސަރުކާރުން ހިންގި މަޝްރޫއުތައް މި ސަރުކާރު އައިސް ހުއްޓާލި ކަމަށް ބުނާ ވާހަކަތައް ކަމަށެވެ. ނަމަވެސް އެ ވާހަކަތަަކަކީ ދޮގެއް ކަމަށެވެ. އަދި އެ ވާހަކަތަކަށް ޖަވާބު ދެއްވާނީ "އަދަދުން" ކަމަށް ރައީސް ވިދާޅުވިއެވެ.

ޕްރޮޖެކްޓްތައް ހުއްޓިފައި ހުރީ ނިމިދިޔަ ސަރުކާރުގަ ދައްކަން ޖެހޭ ފައިސާ ނުދައްކާގެން ކަމަށާއި 9000 މިލިއަނަށްވުރެ ގިނަ ފައިސާ ނުދައްކާ ހުރިކަމަށް ވިދާޅުވިއެވެ. އެހެން ނަމަވެސް މިހާރު އެފައިސާގެ ބޮޑުބައެއް ދައްކާ ގިނަ ޕްރޮޖެކްޓްތައް އަލުން ފަށިފައިވާކަމަށް ވެސް ރައީސް ވިދާޅުވިއެވެ.

މިގޮތުން: 

• ފެނާއި ނަރުދަމާގެ މަޝްރޫއުތަކުގެ 27 ހުއްޓިފައި ހުރި ކަމަށާއި ނަމަވެސް މި ސަރުކާރުން އެ މަޝްރޫއުތަކާއެކު ޖުމްލަ 74 ފެނާއި ނަރުދަމާގެ މަޝްރޫއުތައް ފަށާފައިވާ ކަމަށް ރައީސް ވިދާޅުވި
• ބަނދަރު ހެދުމާއި ބިން ހިއްކުމާއި ބަނދަރު ތޮށި ލުމުގެ 30 މަޝްރޫއު ހުއްޓިފައި ހުރި ނަަމަވެސް މި ސަރުކާރުން ބަނދަރު ހެދުމާއި ބިން ހިއްކުމާއި ބަނދަރު ތޮށި ލުމުގެ 90 މަޝްރޫއު ވަނީ ފަށާފައި
• އެއަރޕޯޓް ހެދުމުގެ މަޝްރޫއު 7 ރަށުގައި ހުއްޓިފައި އޮތް ނަމަވެސް އެ 7 މަޝްރޫއު މިހާރު ކުރިއަށް އެބަދޭ
• މަގު ހެދުމުގެ މަޝްރޫއު 17 ހުއްޓިފައި ހުރި ނަމަވެސް މި މަޝްރޫއުތައް ފަށާ 26 ރަށުގައި މަގު ހެދުމުގެ މަޝްރޫއު މިހާރު ކުރިއަށް އެބަދޭ
• ދަނޑުތަކާއި ކޯޓުތައް ހެދުމުގެ 87 މަޝްރޫއު ހުއްޓިފައި ހުރި ނަމަވެސް 71 މަޝްރޫއު ފަށާ ބައެއް މަޝްރޫއުތައް ވަނީ މިހާރު ނިމިފައި
• މިސްކިތްތަކުގެ 20 މަޝްރޫއު ހުއްޓިފައި ހުރި ނަމަވެސް 42 މިސްކިތުގެ މަޝްރޫއު އެބަ ހިނގާ
• ތައުލީމީ ދާއިރާގެ 90 މަޝްރޫއު ހުއްޓިފައި ހުރި ނަމަވެސް 217 މަޝްރޫއު ސަރުކާރުން މިހާރު އެބަ ހިންގާ